شلون تزوجتي؟
والله ريلي كان رفيج اخوي من عمر و خطبني

السيناريو
المعرس الله يحفظه رفيج اخوها حيل و يوم من الايام استوعب المعرس انه اخت الرفيج كبرت و اهوا كبر و قرر انه يتزوج و قال ماكو احسن من اخت رفيجي أنا عارفهم عدل و عارف اهلهم عاد راح المعرس و بشر امه
الام ماصدقت خبر

جك بم يرن التليفون إحنا شايفين بنتكم

السيناريو الحالي رقم ١
المعرس رفيج الاخو من عمر وطلعات
في يوم من الايام قرر الاخو يتزوج و تزوج بنت الحلال عاد المعرس الله يحفظه (غار) شلون رفيجي يتزوج و أبقى أنا اخر واحد من الديوانية مو متزوج راح و قال حق الام تره بتزوج
مسيكينه الام قالت شرايك في اخت فلان؟
المعرس : لا يما هذي في حسبة اختي

(مانبي هذي الأخوة الي تنزل فجأة )
ولا اكو حس معرس
و لا اكو حس تليفون

و يستمر البحث عن المعرس

السيناريو الحالي رقم ٢
المعرس رفيج الاخو من عمر و طلعات و كله معا بعض
قرر الاخو ويا رفيجه المعري انهم يعرسون الظاهر حسوا انهم كبروا او انه الدوانية كلها تزوجو و بس بقى اهما
الاخو راح حق الام و تزوج بنت الحال
المعرس الداثر كان معجب في الاخت بس من كثر ما اهوا داثر ماتكلم ولا تلحلح و الام مسيكينة تدورلا و اهوا يقول لا
نص الكويت خطبولا و اهوا يقول لا

جك بم
البنت تتزوج

وين العروسة؟
ماكو عروسة

سؤال؟
اذا احد الأطراف سواء كان ولد او بنت تتقبل الطرف الثاني يبدي في الإعجاب؟
و شلون؟


شلون تزوجتي؟
والله ساكنين في فيريجنا و الام تعرف امي و شافني و خطبني

السيناريو
البنت و اهيا صغيرة تقرقع في الفريج مع البنات و الولد (المعرس الله يحفظه) يقرقع مع صبيان الفريج و كلهم يتحدون بعض منو قرقع اكثر من الثاني
و كبرو عاد و كل من ثقل على الثاني
و ام المعرس قررت تخطب البنت حق ولدها
عاد اهوا عارفها من ايام الطفولة و يشوفها كل يوم لما توصل البيت و يصادفها في الفريج

جك بم
يرن تليفون البيت احنا شايفين بنتكم

السيناريو الحالي
البنت قرقعت في كل مناطق الكويت ماكو منطقة ما راحات قرقعت فيها
و كبرت و ماكو شارع ما افترت فيه
و لفت فيريجهم فر و كل ديوانية اب كل فريج فرت عندهم

و ماكو حس تليفون
و ماكو حس معرس

وين المعرس؟
و يستمر البحث عن المعرس


يوم الجمعة المغرب العادة في نفس هذي الحزة تكثر اتصالات الخطب
و فجأة يرن تليفون البيت
الاخت الصغيرة : الو؟
ام المعرس الله يحفظه : الو منو فلانة؟ ( قصدها العروس) الله يحفظها
الاخت : لا أنا أختها
ام المعرس : وين امج؟
الاخت : موجودة الحين اناديها
الام : الو؟
ام المعرس: الو السلام عليكم معاي فلانة؟
الام : و عليكم السلام اي نعم امري
ام المعرس : معاج فلانة الفلاني
الام : هلا والله (وقلبها حس انه الموضوع خطبة) وتنقز الاخت تنادي أختها
ام المعرس: ماعليكم زود والله أنا مابي أطول الموضوع بس والله إحنا شايفين بنتكم فلانه و وحابين نأخذها حق ولدنا فلان ( و الحين لازم توصل ولدها السماء ) ترا اهوا مكون نفسه من مواليد السنة الفلانية و قايم فينه قومه و يشتغل في المكان الفلاني و بنتكم راح تكون عزيزة مكرمة بينه
الام : والله ماعليكم كلام الكل يشهد بس تدرين لازم اكلم البنت و اكلم أبوها و ان شاء الله خير( الام تسوي روحها ثقيلة ) و البنت تطالعها
ام المعرس: أكيد أخذوا وقتكم و ان شاء الله أدق عليج بعد جم يوم نسمع الرد
خلصت المحادثة الهاتفية
و فصلوا الولد و امه تفصل منو يده منو يدته منو عمه منو خاله منو خواته منو إخوان
منو مناسبين
و الموافقة الأولية موجودة و الى حد هني الوضع تمام
الام تروح تفتح الموضوع مع الابو
ترا دقوا يخطبون فلانة اليوم دقت فلانة مرت فلان
الابو بدون لا يسمع الباجي
لا لا ماكو

الام : ليش الولد خوش واحد و امه خوش وحده
الابو: لا لا اقولج لا

و تتحبط الام
و تتحبط البنت

و ماكو معرس
و يستمر البحث عن المعرس


شلون تزوجتي؟
والله كان تفتيش و الشرطي شافني و خطبني

السيناريو
البنت سايقة سيارتها و فجأه يصادفها تفتيش
الشرطي ( المعرس الله يحفظه ) : الإجازة و الدفتر
البنت تطلع الإجازة و الدفتر بدون كلام
الشرطي : تفضلي حركي حركي

جك بم
يرن تليفون البيت والله شايفين بنتكم

السيناريو الحالي
البنت سايقة دايسة و تبتون و تطوف الاشارة و تدش لفة غلط و تدعم الرصيف و ممنوع الوقوف
ولا اكو شرطي يخالف ولا اكو معرس
لو داعمة دورية جان ابرك

وين المعرس؟
ويستمر البحث عن المعرس


شلون تزوجتي؟
ام ريلي شافتني في عرس فلانه و خطبتني

السيناريو
البنت تروح العرس كاشخة و متعطرة
و العرس زحمة
و البنت قاعدة مستحية تطلع اغنية حلوة تقوم البنت ترقص
تشوفها ام المعرس الي ليلحين ما عرس و تسأل فلانة منو؟
منو امها؟
اي خير ان شاء الله

جك بم
يرن تليفون البيت شايفين بنتكم

السيناريو الحالي
البنت تروح العرس كاشخة و متعطرة
تسلم على الي تعرفها و الي ماتعرفها و ماكو اغنية ماتقوم ترقص عليها و اذا ما ارقصت حصلت زف من يدتها او امها او عماتها
و اذا الام مركزة على معرس تنيشن على امه و تخلي البنت تقوم ترقص جدامها و تسلم عليها و تبوس راسها
و اذا كان المعرس الله يحفظه بيدخل مع المعرس الصجي صارت السالفة جد و خلت بنتها تقعد على الطرف اول صف عشان الرؤية تكون واضحة

و كل من يرد بيته
ماكو حس تليفون يرن
و ماكو حس معرس

وين المعرس؟
و يستمر البحث عن المعرس


شلون تزوجتي؟

كنت رايحة المستوصف تعبانة و بالصدفة الدكتور كان صغير شافني و خطبني

السيناريو

البنت رايحة المستوصف فيها نشلة تعطي الكاتب بطاقتها و يعطيها ورقة فيها رقم العيادة

تروح البنت مسيكينه تعبانة و تدخل و المعرس الله يحفظه اهوا الطبيب كاشخ بالبالطو الابيض و يقول لها سلامات ماتشوفين شر و يكتب لها جم دوا

جك بوم

يرن تليفون البيت والله شايفين بنتكم

السيناريو الحالي

البنت مافيها شىء تروح المستوصف تنشف ريج الكاتب

منو الدكاترة؟ شسمهم؟

و تنقي واحد نقوة

و تدخل تتميرض و الدكتور هم كاشخ بالبالطو الابيض و يقول سلامات ماتشوفين شر و يصرف لها جم دوا

و ترد البنت البيت

و ماكو اتصال

وين المعرس؟

و يستمر البحث عن المعرس


شلون انخطبت فلانة ؟ كانت رفيجة خواته

السيناريو

البنت تزور بيت رفيجتها على الغداء يرجع المعرس الله يحفظه يدخل و يشوف البنت يسوي روحه صاد و من يصعد يدق على اخته تليفون صعديلي فوق أبيج

تصعد الاخت حق اخوها

المعرس: منو معاج؟

البنت : رفيجتي

المعرس: ادري رفيجتج شسمها

البنت : فلانه الفلاني

المعرس : خلاص بس روحي

البنت نزلت كملت غداها و الحلو ورا و صلو العصر و نحط الجاي و البنت تخلص و تروح بيتهم

الاخت سيده راحت حق الام

يما فلان شاف فلانه و سالني عنها

الام مستانسة

جك بم

يرن التليفون إحنا شايفين بنتكم

السيناريو الحالي

البنت تزور و تشوف الاخو و ولد العم و ولد الخالة و الربع كلهم

و ترد البيت

ماكو اتصال و لا اكو شىء

وين المعرس؟

و يستمر البحث عن المعرس

تابع

Get every new post delivered to your Inbox.